Kurz vor Phase "Dach"

Nach es paar intensive Wuche isches jetzt denn so wiit, d Phase vom Muure isch vorerst abgschlosse! Es isch ned immer ganz eifach gsi und het eus und au die Verantwortliche vor Ort es bitzli Nerve kostet - d Priise schwanke, Transport-Organisation isch en Sach für sich und unterschiedlichi Erwartige, Vorstellige und Gwohnheite hend die intrakulturell Zämearbeit ned loh langwilig werde loh. Und doch hemmers gschafft! Praise to the Lord!

D Sicherheit ufem Bau würd be eus wahrschienli en chline Konflikt mitde SUVA uslöse...

Mer sind mega dankbar, dass niemert sich verletzt het be dem Bau und bis jetzt alls so guet glaufe isch. Immer wieder stuune mer über die kreative Lösige wo de Joel und sis Team bringe!

Für dass nechst Wuche d Dach-Konstruktion cha starte, macht de Mathews am Mentig no en grossi Shopping Tour in Blantyre. Alle Stahl und Zueghörigs wird denn mitemene grosse Truck nach Agabu bracht und dete zämebaut.

Mer händ eus us Termite-technische Gründ für Stahl entschiede, au wenn das bitz tüürer isch als Holz. Defür wirds länger hebe!

Scho in 6 Wuche wärde mer mitemene Team vo 6 Lüüt wieder in Agabu si und (hoffentlich) im Huus chönne wohne. Dass bis denn Dach, Türe und Fenster installiert sind, sötti realistisch si. Elektrizität (Solar) und sanitäri Ahlage wärde mer aber vorussichtlich no im Extending Hope Gästehuus näbedra oder ih de Extending Hope Clinic müsse go nutze.

Wer weiss, velecht bisch du ja begabt ih eim vo dene zwei Gebiet und chunnsch spontan mit und hilfsch eus debi? :-)

Do no zwei-drü Impressione vo de letzte Phase.

(ja, mer wüsse, dass d Veranda schräg worde isch.. :-))

Nume bitzli viel Bachstei :-) Übrigens us Produktion vom Decent Levson, Gründer vo Extending Hope.

D' Muure sind am wachse!

Sit em 19. April isch Phase 2 im Gang und d Muure wärde jede Tag höcher und lönd s Ganze langsam wie es Huus usgseh. Am erste Tag hets Verzögerige geh, well de Transporter vo de Backstei en Panne gha het. Drum isch nedso viel gange ah dem Tag.

De Joel, euse Head of Construction, het föif gueti Arbeiter usgsuecht und ahgstellt, wo mit ihm tatkräftig ahpacke. D Ihwohner vom Dorf Agabu, dete wo das Huus baut wird, sind dankbar um d Möglichkeit, nöime chönne z schaffe und eppis z verdiene. So sind innerhalb vo wenige Stunde schnell gueti Arbeitskräft gfunde.

Neu für mich isch gsi, dass Wasser bringe in Malawi en typische Job für Fraue isch. So het de Joel no drü Fraue ahgstellt, wo Wasser bringe, für de Mörtel z mische.

Für bis zum Sturz (de Teil oberhalb vo Fenster und Türe, für all wo au ned wüsse was das isch ;)) wird no en witeri Wuche benötigt. Für de Sturz und de Rest vo de Muure bis unter s Dach sind namal 4 Wuche ihgrechnet. So wär s Ziel, dass bis am 03.06.22 alli Wänd stönd und mitem Dach chan ahgfange wärde. Wie do ersichtlich, simmer jedoch mit de Finanze no ned ganz dete.

Im April bin ich, Michelle, für zwei Wuche dete gsi und ha verschiedni Meetings mit em Mathews und Joel gha. Mit Shannon und David, Fründe vo de Schwiiz, beni go Offerte ihhole für Fenster und Türe. Leider isch es in Malawi gar ned so eifach, gueti Fenster und Türe z finde. Vieles wird us Holz gmacht und oft isch au ned alles ganz so grad oder gnau.

Dur lokali Kontäkt vo Extending Hope hämmer aber en Schweisser gfunde, wo en gueti Referenz het. Do simmer momentan no im Prozess, was wie wo wenn gnau.

Well in Agabu sehr viel Termite heimisch und aktiv sind, simmer zwunge, Stahl oder Aluminium z verwende, und Holz nur sehr sparsam ihzsetze. Zuesätzlich isch es üblich und nötig, d Fenster mit ere Ihbruchsicherig z versehe. Das gseht meistens öppe so us:

Mer sind sehr dankbar, wie de Bau bis jetzt lauft und freue eus, dass es in Zuekunft en Ort in Agabu giht, wo Seminar und Schuelige für d Bevölkerig vo dere Umgebig chönd stattfinde. Das Huus söll em Zweck diene, dass Wüsse und Expertise chan nach Malawi bracht wärde und Inere Umgebig vo funktionierende, nachhaltige Projekt vermittlet wärde.

Mer hend de Johann vo Crowns uf sinere Farm bsuecht und über wiiteri Zämearbeit diskutiert. Sini Methode sind Teil vom Unterricht ich de SSD (School for Sustainable Development), wo im Juli wieder in Agabu startet und mer met eusem Outreach wärde unterstütze.

En churzi Usziit am See het eus Ziit geh, z reflektiere und z gnüsse!

Ganz am Ahfang vo dene zwei Wuche simmer im Kondanani Children Village verbi. Als Waiseheim büüte sie dene Chind en höchere Standard, als die meiste malawische Standard-Familie hend. Die Chind müend nie s Gfüehl ha, dass sie ärmer seiged, als Chind mit liebliche Eltere. Sehr en liebendi und fürsorglichi Organisation https://kondanani.org/.

Alls ufz’liste sprängt de Rahme – drum chum doch selber mal mit und mach dir es Bild!

S Fundament wird fertig!

Nach ca. 5 Woche aktivem Bau simmer en Schritt wiiter mit euesem Gästehuus! S Fundament esch fast fertig - meh oder weniger innerhalb vom Budget und vom Ziitrahme. Das esch doch scho mol en guete Ahfang. :)

Mer sind allgemein sehr happy wie d Zämearbeit bis jetzt funktioniert. De Mathews esch en super Koordinator: Er organisiert d Baumaterialie und het s Budget im Griff. E eusem wöchentliche Telefon werdemer denn immer updated und chönd so vo eusere Siite her guet plane. Au d Buechhaltig funktioniert bis jetzt guet, das macht eus zueversichtlich dasmer au be de nächste Bauetappe guet sötted über d Runde cho.

Was sich als usefordernd gstaltet esch de oft benötigti Transport vo Blantyre nach Agabu. Vieli Baumaterialie wo ned grad 0815 sind, also zum Biispiel hochwertige Zement, Armierigsiise oder Termitegift, müend müehsam über 3h Wäg per LKW transportiert werde. Organisatorisch und budgetmässig hämmer das e chli unterschätzt. Aber das ghört halt dezue wemer zmitzt im Busch es halbwegs hochwertigs Huus wet baue. :)

S Fundament lömmer jetz es paar Woche lo ruhe, so dasmer Mitti April chönd mit de Wänd undem Dach wiiter mache. S Ziil esch dasmer spätistens Endi Mai es meh oder weniger fertigs Huus händ und mer eus denn vorallem no ufd Inneihrichtig chönd konzentriere. Ab Mitti Juni hämmer nämlich scho eusi erste malawische Gäst - und en Monet spöter findet euse Outreach mit bis jetz 8 Schwiizer statt.

D Michelle reist im April für 2 Woche nach Malawi und wird unter anderem au fürs Huus no einigi Sache organisiere. Zum Biispiel müemmer no Fenster und Türe ussueche und chaufe. Zudem wird sie no verschiedni anderi Organisatione bsueche und so euses Netzwerk in Malawi wiiter usbaue.