Es goht los!

Mer sind en Schritt wiiter! De Bauplatz esch definiert, s Fundament wird usghobe und gueti Lüüt sind ahgstellt - die wichtigste Ziel vo mim zweiwöchige Ufenthalt in Malawi sind erfüllt!

Es esch ned ganz eifach gsih. Am Ahfang het zum Biispiel en starche Tropesturm scho mol de ersti Strich durd Rächnig gmacht. D Strasse sind voll Löcher und es goht alles länger alsmer denkt - aber hey, das esch Afrika.

Wieder zrugg in Agabu z’sih, het neu inspiriert. Letscht mol esch alles troch und dürr gsih (au das het sini Schönheit), doch jetzt wachst alles und esch satt-grüen. Mittlerwiile esch au d Highschool guet bevölkeret und e de Klinik laufts rund. S Staff-huus esch ziemlich voll, und dorom wirds höchsti Ziit für euses neue Gästehuus. :)

Über euse lokali Kontakt, de Decent, hämmer en guete Mah, de Mathews gfunde. Er esch ab Februar be eus ahgstellt und esch euse Stellvertreter vor Ort. Im Moment hetter alli Händ voll ztue mit de Organisation vom Bau und mit de Buechfüehrig vo allne eusne Usgabe. Über ihn hämmer denn au no de Joel kenne glehrt, euse Baumeister. Er esch en stille und sympathische Mah, wo öbbis vo sim Handwerk verstoht. Zäme mit de lokale Arbeiter vo Agabu wird er euses Huus baue!

Bis Mitti März bauemer s Fundament, wo denn mues ruhe für es paar Woche. Im April gohts den los mit de Wänd und mitm Dach.

Näbe allem „Schaffe“ hani au no viel Ziit gha, neui Lüüt kenne z lehre und schöni Ort uszkundschafte. Als Abschluss vom Outreach im April wämmer nämlich no 2 Täg an Lake Malawi - ich ha jetz scho e schöni Lodge und en neue Fründ gfunde, wo eus mitem Boot um d Inslene Fahrt und Tier zeigt!

Im April simmer wieder det - chonnsch mit?